أكد الإعلامي مصطفى بكري أن الحكومة بدأت في تعديل مسارها مشيرا إلى أنها أصبحت تتعامل بموضوعية مع كافة الآراء.
وقال بكري خلال برنامج "حقائق وأسرار" المذاع على قناة "صدى البلد": "الحكومة بتعدل مسارها وأتمنى أن تستمر بالشكل ده وتتعامل بموضوعية مع كافة الآراء وتسمع صوت الناس، شوفنا في حزب مستقبل وطن وجهات نظر مش داعمة للحكومة على طول وشوف تنسيقية الشباب والسياسيين كان ليهم وجهات نظر وشوفنا المعارضة تحدثت بكل موضوعية وأحزاب حذرت من خطورة تزايد الدين وزيادة أسعار الوقود".
وأضاف: "توجهات الرئيس السيسي معروفة في هذا المجال كان في توجيه بتقليل حجم الدين وتحديدا القروض ذات المكون الدولاري وقال مفيش قرض يتعمل إلا بموافقتي شخصيا".
وتابع: "الديون بتاخد 65% من مجمل الناتج المحلي العام أو زي ما قال النائب محمد الفيومي إن كل طفل مصري بيتولد عليه 109 ألف جنيه ديون ودا موضوع مزعج ومقلق".
وواصل: "لما أزود أسعار الوقود الزيادة الكبيرة دي تخليني أقول للحكومة ياترى هتعرفوا تحاصروا زيادات الأسعار اللي بتجري بشكل عشوائي أسعار الميكروباص وأسعار الفاكهة والخضار واللحوم ولازم الحكومة تعرف أن هذه الزيادات بتشغل بال المصريين جميعا".
وأوضح: "الناس ياجماعة تعبت صحيح كلنا عارفين خطورة الأوضاع والأعباء الجديدة اللي بتطلبها الأوضاع الحالية ولكن خلونا نبحث عن منافذ أخرى نسد بيها احتياجاتنا حفاظا على الناس وأوضاعها الاجتماعية".
واختتم: "أذكر الحكومة لما قال الرئيس السيسي الشعب المصري يستحق وسام الصبر والصمود وأنا بقوله ياريس الناس مستحملة كل ده عشان عندها ثقة في سيادك وعارفة المشاكل اللي بتواجهها البلاد على كل الاتجاهات ولكن بردو الحكومة لازم تبقي براحة على الناس، الناس مش قادرة تكمل".
