يا ترى إيه اللي خلّى صادرات مصر غير البترولية تقفز 29% في أول شهرين من 2025؟ .. وليه قطاع زي مواد البناء اتحول فجأة وبقا أهم قطاع حقق صادرات ؟ .. وهل الرقم اللي وصلناله ده يعني إننا فعلاً ماشيين على الطريق الصح ولا الدولة عينها على أرقام أكبر بكتير؟
صادرات مصر غير البترولية وصلت لـ8.67 مليار دولار في يناير وفبراير 2025 .. بزيادة 29% عن نفس الفترة في 2024 لما كانت 6.72 مليار دولار .. وده معناه إن مصر زوّدت دخلها من تصدير حاجات زي مواد البناء والمنتجات الهندسية والزراعية والكيماويات بقيمة 2 مليار دولار إضافي في شهرين بس .. ده رقم مش قليل.. لأن كل دولار بيدخل البلد بيفرق في الاقتصاد .. بيساعد في توفير فرص شغل .. ويقلل الضغط على الجنيه.
بس عشان نفهم الصورة كلها .. لازم نعرف إن الطفرة دي جت منين .. القطاع اللي قاد السباق هو مواد البناء والصناعات المعدنية .. تخيّل إن القطاع ده لوحده جاب 3.17 مليار دولار .. بنمو 138% عن سنة 2024! .. وده معناه إن مصانع الحديد والأسمنت والرخام بتاعتنا بقت مطلوبة بقوة في دول زي السعودية وليبيا وإيطاليا والإمارات وحتى البرازيل.. طلبات تصدير قياسية وصلت .. ومصر استغلت الفرصة دي بذكاء.
في المركز التاني جت الصناعات الكيماوية والأسمدة بـ1.29 مليار دولار .. بس هنا فيه تراجع 6% عن السنة اللي فاتت .. وكمان الحاصلات الزراعية نزلت 5% لـ985 مليون دولار .. والصناعات الغذائية تراجعت 1% لـ1.01 مليار دولار .. لكن الخبر الحلو إن المنتجات الهندسية والإلكترونية زادت 21% ووصلت 1.02 مليار دولار .. يعني لسه في قطاعات بتسحب الصورة لفوق.
طب الارتفاع الكبير ده فى صادرات مصر معناه ايه وايه تأثيره؟
8.6 مليار دولار دول مش مجرد رقم .. ده بيعني إن مصر بقت لاعب قوي في السوق العالمي .. بس لازم نفهم الصورة كويس .. الزيادة دي حلوة .. لكن ليه فيه قطاعات زي الكيماويات والزراعة تراجعت؟ .. الإجابة إن السوق العالمي مليان تحديات .. وفيه منافسة قوية .. وأحياناً الأسعار العالمية بتأثر على المنتجات زي الأسمدة والمحاصيل.
لكن اللي يخلّي الرقم ده مميز إن 5 قطاعات بس .. مواد البناء والكيماويات والمنتجات الهندسية والزراعة والأغذية .. شالوا 86% من الصادرات .. يعني مصر مركزة على نقاط قوتها .. وده ذكاء اقتصادي .. لأن لما تركز على القطاعات اللي بتجيب فلوس كتير .. بتضمن استدامة النمو.
نيجي لسؤال مهم.. الزيادة دي طبيعية ولا الدولة عايزة أكتر؟
النمو بتاع 29% في شهرين ده كويس جداً .. خصوصاً إن 2024 كانت سنة قوية أصلاً .. لما الصادرات غير البترولية وصلت 40.8 مليار دولار بنمو 14% عن 2023 .. بس الدولة مش ناوية تقف هنا .. مسؤول حكومي قال إن مصر بتستهدف 45 مليار دولار بنهاية 2025 .. وده هدف طموح .. بس ممكن يتحقق على ارض الواقع لأن مصر بقت منافس قوي في السوق الأمريكي .. خصوصاً بعد ما أمريكا فرضت رسوم جمركية على دول تانية منافسة لينا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
