ليه صندوق النقد الدولي رفع توقعاته الإيجابية الاقتصاد المصري وايه اللي هيحصل في الفترة الجاية وايه تأثير توقعاته الجديدة على حركة الاستثمارات الأجنبية والعربية.
من ساعات صندوق النقد الدولي أصدر تقرير حديث عن معدلات النمو الاقتصادي في عدد كبير من الدول ومن بينها مصر واللي فجر فيها مفاجأة لما توقع تحسن ملحوظ في أداء الاقتصاد المصري خلال السنتين اللي جايين والمقبل نتيجة تعافي معدلات نمو الناتج المحلي الإجمالي الحقيقي وتراجع تدريجي في معدلات التضخم وبحسب آخر تقرير لآفاق الاقتصاد العالمي الصادر عن الصندوق ضمن فعاليات اجتماعات الربيع لصندوق النقد والبنك الدولي من المتوقع يرتفع نمو الناتج المحلي الإجمالي الحقيقي في مصر من 2.4% في 2024 إلى 3.8% في عام 2025، ليصل إلى 4.3% في عام 2026 وكمان الصندوق توقع تراجع معدلات التضخم بل تدريجي إلى 19.7% في 2025، ثم الهبوط إلي 12.5% بحلول السنة الجاية.
طيب ايه اسباب تحسن المؤشرات الاقتصادية اللي الصندوق اعتمد عليها في توقعاته؟
الصندوق مؤسسة مالية عالمية وتقاريرها بتعتمد على مؤشرات وبيانات حقيقية ولما يطلع تقرير زي دا معناه إن كل الأرقام بتقول إن الاقتصاد المصري بدأ مرحلة التعافي بعد الأزمات الكبيرة في العالم ودا اللي قلناه من بانكير من كام يوم.. ولو بصينا على أسباب التحسن هنلاقيها كتير جدا منها زيادة معدل تدفق الاستثمارات الأجنبية والعربية للسوق المصري بأرقام ضخمة وآخرها جذب 29 مليار دولار استثمارات خليجية جديدة بعد صفقة رأس الحكمة والاستثمارات دي رايحة لقطاعات اقتصادية استراتيجية زي الطاقة والسياحة والصناعة والمشروعات العقارية.
كمان زيادة تحويلات المصريين بالخارج الي 20 مليار دولار في اخر إحصائية رسمية ومتوقع وصولها لاعلي معدل وصلته وهو 30 مليار دولار تقريبا.. ومش كده وبس كمان مصر بتحقق قفزات كبيرة في إيرادات السياحة ووصلت للرقم 16 مليار دولار وفي انتظار قفزة جديدة في الموسم الحالي مع افتتاح مشروعات سياحية ضخمة زي المتحف المصري الكبير ومشروع التجلي الاعظم والقاهرة الفاطمية وغيرها من المشروعات السياحية..
في قطاع التصدير مصر بتحقق أرقام قياسية ووصلت ل40 مليار دولار والرقم بيزيد كل سنة عن التانية وهيوصل لاكتر من 150 مليار دولار في 2030 وفي آخر تقرير زادت صادرات مصر غير البترولية لـ8.67 مليار دولار في شهرين بس وهما يناير وفبراير 2025 .. بزيادة 29% عن نفس الفترة في 2024
تقرير صندوق النقد الدولي رصد كمان بداية عودة قناة السويس الي كامل طاقتها الملاحية وتحقيق أرقام قياسية في الفترة الجاية مع انتهاء الأزمة في جنوب البحر الاحمر وكمان مصر ماشية بخطوات كبيرة جدا في ملف توطين الصناعة وتقليل فاتورة الاستيراد ودا غير أنها بتستعد لافتتاح عشرات المشروعات القومية والإستراتيجية في الفترة الجاية واللي هتغير خريطة الاقتصاد المصري زي مشروعات الربط الكهربائي والمناطق الصناعية الجديدة ومشروعات الطاقة النظيفة ومشروعات سياحية وفندقية في الساحل الشمالي وغيرها من المشروعات الضخمة.
كل دا بيقول إن مصر بدأت في التعافي السريع من أزماتها اللي ظهرت نتيجة الأوضاع الصعبة اللي حولينا واللي مصر ملهاش دخل فيها لكن قدرت تتجاوز دا وتوفر الدولار وبتسعي لزيادة المعروض منه بشكل كبير ودا هينعكس على سوق الصرف وتراجع التضخم والاسعار وزيادة النشاط الاقتصادي وبالتالي زيادة الناتج المحلي ومعدلات النمو.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
