ليه الدولار دخل في الاسبوع التاني وهو بينزل من أعلي مستوي وصل في الفترة اللي قبلها وهل دا معناه أن الوحش الأخضر تم ترويضه وايه كلمة السر في الهبوط..
النهاردة اول يوم تداولات للبنوك بعد فترة اجازات وسعر الدولار لسه بينزل وإن كان بشكل طفيف وسجل نهاردة في بعض البنوك 50.98 جنيه من 52 جنيه تقريبا قبل اسبوعين لو متابعين سعر الصرف..
الهبوط المستمر للدولار على مدار الأسبوع الماضي وبداية الاسبوع الحالي وراه لغز لأن الطبيعي سعر الدولار يزيد بسبب تراكم الطلب على الدولار خاصة في تعاملات أول الاسبوع زي ما بيحصل وبعدها يرجع ينزل لكن دا محصلش المرة دي وهنا كان لازم نعرف ليه.
شوف حضرتك على مدار الأيام اللي فاتت مصر أعلنت عن اتفاقيات ضخمة في قطاع الاستثمارات بجانب اتفاقيات تانية مهمة لتعزيز معروض الدولار بالأسواق اول الصفقات دي كانت صفقات بحوالي 29 مليار دولار من دول الخليج السعودية واللي كشفت عن استثمار بحوالي 15 مليار دولار في السوق المصري ودا على هامش زيارة اكتر من 100 رجل أعمال سعودي وأصحاب الشركات الكبرى وبعدها بساعات أعلنت الكويت عن استثمارات باكتر من 7 مليار دولار لمصر وكمان قطر أعلنت عن استثمارات ب8 مليار دولار ودا بعد زيارة الرئيس السيسي للدولتين وطبعا الرقم الضخم دا انعكس على سوق الدولار في مصر واللي ماشي حسب العرض والطلب وخلق حالة من التفاؤل من استدامة التدفقات الدولارية.
مش كده وبس دا كمان مصر شبه انتهت من إتفاقية لتحويل 4 مليار دولار وديعة كويتية لاستثمارات ومشروعات وصفقات استحواذ ودا معناه تخفيف الطلب على الدولار بشكل كبير وفي نفس الوقت مصر قربت تستلم 4 مليار يورو من حزمة المساعدات والتمويلات الاوربية اللي تم الإعلان عنها مؤخرا يعني احنا احنا بنتكلم عن 34 مليار دولار استثمارات جديدة بخلاف التخلص من الديون الكويتية ودا بخلاف التدفقات الاستثمارية التانية اللي بيستقبلها السوق المصري زي الاستثمارات الإماراتية في مصر وخاصة في قطاع الطاقة واللي بتوصل ل21 مليار دولار وسبق واتكلمنا عليها بالتفصيل هنا في بانكير.
ولسه مع قصة الاستثمارات الضخمة في مصر والمرة دي من اقتصادية قناة السويس واللي استقبلت 8 مليار دولار في ستين وفيه توقعات بوصول 90 مليار دولار جديدة للمنطقة في مشروعات تصنيع الهيدروجين الأخضر واللي مصر من اكتر الدول في العالم اللي هتستقبل استثمارات فيه بسبب انخفاض التكلفة في التصنيع وسبب إمكانيات طاقة الرياح والشمس الواعدة في مصر ودا مصدر جديد ومستمر للاستثمارات الخارجية وتدفقات دولارية مستدامة... ودا غير الاستثمارات الجديدة في قطاع الصناعة بكل أنواعها.
كل العوامل دي من التدفقات الدولارية الضخمة هي كلمة السر وراء تراجع الدولار في الفترة الحالية ومتوقع استمرار التراجع مع دخول الاستثمارات الخارجية وزيادة الطلب على السندات المصرية رغم خفض الفايدة وكل دا هينعكس على الاقتصاد المصري واستقرار سوق الصرف وتجنب اي أزمات مستقبلية.. كمان انخفاض سعر الدولار معناه انخفاض أسعار السلع المستوردة من الخارج ودا في صالح المواطن.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
