منصات بانكير قدمت عدد من التقارير الخاصة والتحليلات في الشأن الاقتصادي والمالي المصري والأسواق المختلفة..البداية مع تقرير خاص عن قطاع الصادرات المصرية وقال التقرير إن الصادرات المصرية شهدت قفزة كبيرة في الربع الأول من 2025 ودا اللي صرح بيه عصام النجار، رئيس الهيئة العامة للرقابة على الصادرات والواردات المصرية، واللي كشف أن الصادرات المصرية ارتفعت إلى 12.67 مليار دولار خلال الربع الأول من العام الحالي بزيادة قدرها 27% مقارنة بالفترة نفسها من العام الماضي.
وحسب تصريحات النجار مصر بتستهدف زيادة الصادرات بنهاية العام بنسب تتراوح ما بين 10% إلى 15%.
ولفت تقرير بانكير إن الدكتور مصطفى مدبولي، رئيس الوزراء، سبق وصرح أن مصر بتستهدف زيادة صادراتها بنسبة تتراوح بين 15% إلى 20% سنويا.
وقال بانكير إن الأرقام الأخيرة للصادرات بتقول إننا في انتظار قفزة جديدة لعام 2025 ودا معناه زيادة أكبر في موارد الدولار واستقرار في سعر الصرف وانخفاض أسعار السلع المستوردة والوصول لرقم 154 مليار دولار في 2030.
التقرير التالي اللي قدمته وحدة أبحاث بانكير كان بخصوص إزاي قناه السويس هتتوسع في افريقيا ودول المنطقة وازاي فكرت تستثمر إمكانياتها في الاستثمار بالخارج وعمل مشروعات عملاقة وايه تأثير الفكر الجديد على إيرادات القناة..
وشرح التقرير إن قناة السويس هي أهم ممر ملاحي في العالم كله وهي مورد أساسي من موارد الدولار في الدولة المصرية وواحدة من أهم أدوات القوة الاقتصادية والسياسية والتجارية في الدولة وواحدة من معالم شهرة مصر عالمياً وهي قناة مصرية خالصة بتقع في كامل التراب الوطني.
ولفت بانكير إن قناة السويس شهدت تطوير غير مسبوق في تاريخها بعمل مشروع قناة السويس الجديدة وتوسعة المحور الجنوبي وبقت رايح جاي وبقت مستعدة تستقبل كل انواع السفن والحاويات مهما كان عمق غاطسها وبأي عدد ممكن ودا خلاها تسجل أرقام قياسية ووصلت في 2023 لحوالي 10.2 مليار دولار لكن الأزمات الأخيرة في جنوب البحر الاحمر وقفت تحقيق الأرقام القياسية.
وشرح بانكير إن قناة السويس قررت تتحرك ومتنتظرش عودة الملاحة وبدأت فكر جديد بره الصندوق عشان تعظم مواردها وتنطلق اكتر واكتر وبدأت بإدخال خدمات تموين السفن وبعدها قررت تدخل في استثمارات خارجية والمرة دي هتعقد شراكات مع عدد من الدول الأفريقية لبناء وإصلاح الموانئ بحسب أسامة ربيع، رئيس هيئة القناة بخلاف مشروعات حالية مع السعودية والأردن في بناء الأرصفة وإصلاح اللانشات البحرية.
وقال بانكير إن هيئة قناة السويس بتطمح تكون وحش اقتصادي مصري يدخل موارد إضافية من الدولار وكله بيصب في مصلحة الاقتصاد المصري وفي زيادة التدفقات الدولارية للبلد ومع الايام الهيئة هتتوسع أكتر في الاستثمار الخارجي بعقود شراكات جديدة مع نجاح المشروعات اللي تم الاتفاق عليها بالفعل.
وأشار التقرير إن خطط قناة السويس للتمدد خارج الحدود المصرية بيتزامن مع خطط مصرية تانية لتعظيم كل موارد الدولار في البلد واختراع موارد جديدة وغير تقليدية زي مبادرات تصدير العقار وسيارات المصريين بالخارج والاستثمار العكسي للشركات المصرية بالخارج ودا نجح بشكل كبير جدا في الفترة الأخيرة والشركات المصرية نفذت مشروعات بمليارات الدولارات خاصه إن الشركات دي الحكومة بتملك فيها حصص ويتقاسم في الأرباح وفي نفس الوقت الاستثمارات دي بتدعم تحول الشركات المصرية من محلية لعالمية وزيادة محفظة مشروعاتها في السوق المصري.
منصات بانكير قدمت تقرير مختلف عن عوائد السياحة المنتظرة..
وقال التقرير إن السياحة واحدة من الأبواب الرئيسية لمصادر الدخل الدولاري لمصر من الخارج، لكن للاسف وبسبب التوترات الجيوسياسية الأرقام اللي كانت الدولة بتستهدف تحقيقها انخفضت بسبب حالة القلق اللي موجودة عند اغلب السائحين من النزول لمنطقة الشرق الأوسط، والدولة بتحاول تعالج النقطة دي من خلال الرسائل اللي الحكومة بتبثها بشكل مباشر وغير مباشر للترويج لعاملي الأمن والأمان اللي بتنعم بيهم مصر.
وقال التقرير إن حاليا وزارة السياحة والآثار بتشارك في معرض مهم جدا وبيعد من أهم المعارض السياحية الدولية وهو سوق السفر العربي، واللي الدولة بتشارك فيه بوفد حكومي بالإضافة لعدد من شركات القطاع الخاص، واللي هدفه الترويج للسياحة المصرية وتعريف السائحين العرب عن المنتجات السياحية الموجودة في مصر، خصوصا أن السائح العربي لع مكانة خاصة بالنسبة للسياحة المصرية وده بسبب أنه سائح غني وبيصرف كتير وقت نزوله لأي دولة في العالم والنوع ده من السياحة كل دول العالم بتدور عليه، خصوصا أن سائح عالي الأنفاق .
وأشار بانكير إن الحكومة ممثلة في وزارة السياحة والآثار بتكون حريصة خلال النوع ده من المعارض علي عقد لقاءات مع منظمي الرحلات اللي بيكونوا مشاركين في المعرض، وبيعرضوا عليهم المنتجات السياحية الموجودة في مصر، ده غير كمان أن الحكومة بتعمل مسابقات واسئلة للحضور عن المعالم السياحية المصري، وبتكون الهدايا عبارة عن رحلات مجانية للفائزين، وبيكون الهدف من النوع ده من المسابقات زيادة تعريف الحضور بالمقاصد السياحية المصرية، والدولة بتعمل حالة من الشغف عن السياحة المصرية.
التقرير الأخير اللي قدمته وحدة أبحاث بانكير كان بخصوص مهمة محافظ البنك المركزي المصري في الولايات المتحدة.
واستهل التقرير إنه فى الأيام اللى فاتت العاصمة الأمريكية واشنطن بتستضيف الحدث الاقتصادي الأهم في العالم .. اجتماعات الربيع لمجلس محافظي صندوق النقد الدولي والبنك الدولي .. كبار المسؤولين من كل حتة في العالم بيتلموا عشان يناقشوا مستقبل الاقتصاد العالمي .. وبيمثل مصر فى الاجتماعات دي حسن عبدالله محافظ البنك المركزي المصري.
وشرح بانكير إن حسن عبدالله مش بس بيحضر اجتماعات ويتصور .. ده بيشتغل على تقوية مكانة مصر الاقتصادية عالميًا .. خلال الأيام دي .. شارك في اجتماع وزراء المالية ومحافظي البنوك المركزية لمجموعة العشرين.. الاجتماع ده على هامش اجتماعات الربيع .. وناقش مواضيع كبيرة زي استقرار الاقتصاد العالمي في ظل الأزمات زي الحروب وارتفاع أسعار الطاقة .. حسن عبدالله طالب بزيادة دعم الدول النامية من خلال تمويل مبتكر وشراكات جديدة بين القطاع العام والخاص .. وده بيخدم مصر وإفريقيا بشكل مباشر.
وقال التقرير إن حسن عبدالله كان ليه لقاء مهم جدًا مع نايجل كلارك نائب المدير العام لصندوق النقد الدولي .. واتكلموا عن برنامج الإصلاح الاقتصادي اللي مصر بتطبقه مع الصندوق .. اللقاء ده حضره وفد مصري قوي ضم رانيا المشاط وزيرة التخطيط والتعاون الدولي .. وأحمد كجوك وزير المالية .. و محمد معيط ممثل المجموعة العربية في الصندوق .. وكمان رامي أبو النجا نائب محافظ البنك المركزي .. والسفير معتز زهران سفير مصر في أمريكا ..ة اللقاء كان نقطة تحول في علاقة مصر مع الصندوق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
