إزاي مصر هتسيطر على سوق الطاقة في حوض البحر الأبيض المتوسط.. وامتي هتبدأ في تصدير الكهرباء لاوروبا.. وليه مصر بالذات اللي هتسبق الكل في قطاع الطاقة الاستراتيجية بالمنطقة وايه المفاجأة اللي هيحصل قريب.
قطاع الكهرباء في مصر من القطاعات اللي شهدت نقلة نوعية غير مسبوقة ولو حبينا نقارن الوضع في 2013 ودلوقتي هنعرف قد ايه المجهود اللي حصل وكلنا فاكرين ازاي الكهرباء كانت تقطع بالساعات في اليوم.. وطبعا تقدر تتخيل الوضع الاقتصادي والتصنيع والاستثمار في بلد مفهوش طاقة كهربائية.. لكن اللي حصل بعد 2014 كان إنجاز تاريخي في قطاع الطاقة والكهربا واتحول العجز في الطاقة الي فائض في مدة قياسية.
خطط مصر في قطاع الطاقة موقفتش عند الاكتفاء الذاتي من الإنتاج لكن اتطورت إلى تصدير الطاقة الي الدول المحيطة وتحول مصر لمركز إقليمي للطاقة.. ولأن مصر عندها امكانيات ضخمة في إنتاج الطاقة النظيفة زي طاقة الشمس والرياح فدا رشحها إنها تكون مركز الطاقة في حوض المتوسط..
ومن بين خطط استراتيجية الطاقة في مصر لتعظيم توليد واستخدام وتصدير الطاقة الكهربائية النظيفة كانت مشروعات الربط الكهربائي مع الدول التانية ودا بعد استقبال قطاع الطاقة لاستثمارات ضخمة في الفترة اللي فاتت وخاصة في مشروعات الطاقة النظيفة.
طيب ايه الجديد في ملف الطاقة في مصر ؟
اتكلمنا في بانكير قبل كده عن الاستثمارات الإماراتية الضخمة في قطاع الطاقة وازاي بتضخ مليارات الدولارات لإنتاج الكهرباء من محطات الرياح والشمس.. لكن الجديد النهاردة هو في المفاجأة اللي كشفتها وزارة الكهرباء اللي قالت إن استثمارات تصدير الكهرباء من الطاقة المتجددة من مصر إلى إيطاليا هتتراوح ما بين 15 و20 مليار دولار ودا عن طريق كابل كهرباء بحري ودا اللي قالته صباح مشالي نائبة وزير الكهرباء والطاقة المتجددة في مصر.
وكشفت المسؤولة إن مجلس الوزراء برئاسة الدكتور مدبولي وافق على توقيع اتفاق تعاون بين الشركة المصرية لنقل الكهرباء وشركة K&K الإماراتية لاستكمال الدراسات النهائية لمشروع تصدير الكهرباء من الطاقة المتجددة من مصر إلى إيطاليا من خلال كابل بحري.
وقالت مشالي على هامش مؤتمر غرفة التجارة الأمريكية اللي انعفد في القاهره مؤخرا إن تصدير الطاقة المتجددة من مصر إلى الخارج هيكون من خلال كابل بحري بقدرة تصل إلى 3 جيجاوات... وإن الحكومة المصرية انتهت في القترة الأخيرة من الدراسات المبدئية واللي جاءت واعدة بشكل كبير وقالت إن الوزارة دلوقتي بتراجع الدراسات التفصيلية اللي هتوضح حجم الاستثمارات المتوقعة للمشروع واللي مش هتقل عن 15 إلى 20 مليار دولار نظراً لضخامته.
مشالي أكدت كمان إن قطاع الطاقة المتجددة في مصر واعد للغاية وكل يوم فيه تطور بيحصل وإن مصر بدأت خطة لخفض الوقود والغاز المستخدم في إنتاج الكهرباء من أكتوبر اللي فات بعد رفع كفاءة محطات إنتاج الكهرباء وإن دا وفر مليارات الجنيهات من تقليل استخدام الوقود.
المفاجأة التانية بقي هي ان مصر هتنتهي من مشروع الربط الكهربائي مع السعودية خلال الصيف الحالي ودا مشروع ضخم جدا وهو الأول من نوعه وهيساهم في توفير الطاقه في وقت الذروة بجانب زيادة الاستثمارات في قطاع الطاقة في الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
