يا ترى إيه اللي ممكن يخلي الجنيه المصري يقوى فجأة ويبدأ ينافس الدولار؟ .. وإزاي اتفاق واحد بين مصر والكويت ممكن يغير قواعد اللعبة في السوق؟ .. لو عايز تعرف إزاي 4 مليار دولار هيحولوا ودائع عادية لاستثمارات قوية .. وإيه تأثيرها على أزمة نقص الدولار في مصر.
فى الأيام الأخيرة مصر والكويت اتفقوا على تحويل 4 مليار دولار من الودائع الكويتية في البنك المركزي المصري إلى استثمارات مباشرة.
طب يعني إيه الكلام ده؟
بص يا سيدي.. بدل ما الفلوس دي تقعد نايمة في خزنة البنك .. هتتحول لمشروعات حية في مصر .. زي عقارات .. فنادق .. بنوك .. وحتى شركات حكومية داخل برنامج الطروحات .. الخبر ده مش بس صفقة مالية .. ده بمثابة دفعة قوية للاقتصاد المصري اللي بيحاول يتعافى من أزمة نقص الدولار.
خليني أحطك في الصورة بشكل أكبر .. الجنيه المصري في الفترة الأخيرة بدأ يتحسن .. وصل لتحت الـ51 جنيه مقابل الدولار .. وده حصل بسبب كذا حاجة .. أولها إن المستثمرين الأجانب رجعوا يشتروا في أدوات الدين الحكومية المصرية .. وصلت استثماراتهم لأكتر من 41 مليار دولار بنهاية ديسمبر اللي فات .. كمان تحويلات المصريين من برا زادت .. الصادرات بقت أحسن .. والسياحة بدأت ترجع لأيامها الحلوة .. كل ده ساعد إن السوق يبقى فيه دولارات أكتر.
لكن الجديد بقى هو الاتفاق مع الكويت .. الـ4 مليار دولار دول مش هيروحوا كدفعة واحدة .. لا .. الكويت هتبدأ تستثمر نصهم يعني 2 مليار دولار قبل نهاية 2025 .. والفلوس دي هتتوزع على قطاعات زي السياحة والعقارات والبنوك.. وده نفس النموذج اللي حصل مع الإمارات في صفقة رأس الحكمة .. يعني بدل ما ندفع ديون .. الفلوس بتتحول لمشروعات بتخلّي الاقتصاد ينمو وتجيب دخل على المدى الطويل.
طيب .. إيه تأثير الكلام ده على أزمة نقص الدولار؟
ببساطة .. لما الكويت تحول الودائع دي لاستثمارات .. ده معناه إن مصر مش هتضطر تدفع الـ4 مليار دولار كدين .. يعني ضغط أقل على احتياطي النقد الأجنبي .. كمان الاستثمارات دي هتجذب مستثمرين تانيين .. ليه؟ .. لأن السوق هيبقى فيه ثقة أكتر .. والثقة دي هتخلي تدفقات الاستثمار الأجنبي تزيد .. وبالتالي الدولار هيبقى موجود بكميات أكبر في السوق .. وده هيساعد الجنيه يفضل قوي أو على الأقل مستقر
بس خد بالك .. الجنيه لسه ممكن يترنح لو المستثمرين الأجانب غيروا رأيهم .. أو لو حصل تقلبات في السوق العالمي .. زي مثلاً لو أمريكا غيرت سياستها الجمركية.. ده ممكن يأثر على الاستثمارات اللي بتدخل مصر .. عشان كده الحكومة بتحاول تخلّي الاقتصاد يعتمد على مصادر متنوعة .. زي السياحة والصادرات وتحويلات المصريين.
الاتفاق مع الكويت زي إشارة خضرا للسوق .. بيقول للمستثمرين إن مصر بقت جاهزة لاستقبال فلوسكم .. وإن الاقتصاد بياخد خطوات جدية للتعافي .. لكن السؤال المهم .. هل الجنيه هيفضل ثابت ولا هيرجع يترنح تاني؟ .. وهل الاستثمارات دي هتكون بداية لانتعاشة كبيرة ولا مجرد خطوة مؤقتة؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
