ناس كتير بتسال ليه الدولة اختارت يوم 3 يوليو لحفل افتتاح المتحف المصري الكبير.. واية الدلالة من اختيار التاريخ ده بالذات.. وليه الحكومة اختارت فصل الصيف علشان يكون فيه افتتاح المتحف المصري الكبير.
المتحف المصري الكبير واحد من الهدايا اللي مصر هتقدمها للعالم في العصر الحديث واللي هيضم مجموعة كبيرة من القطع الآثرية اللي أول مرة تخرج للنور، واية مرة هتكون معروضة قدام الزائرين أهمهم وأبرزهم المجموعة الآثرية للملك الذهبي توت عنخ آمون واللي هتعرض المجموعة الآثرية بتاعته لأول مرة بشكل كامل من وقت اكتشافها في البر الغربي بالاقصر في 1922 وهيتم عرضها في قاعة خاصة بيها في المتحف المصري الكبير وبيوصل عدد القطع اللي هيتم عرضها داخل القاعة لأكثر من 5300 قطعة آثرية فريدة للملك الذهبي.
الحكومة أعلنت عن اختيار يوم 3 يوليو علشان يكون حفل افتتاح المتحف المصري الكبير، وده له دلاتتين أولهم أنه اليوم ده هو اليوم اللي الرئيس عبدالفتاح السيسي اعلن فيه عن استجابته للجماهير المحتشده في الشوارع والميادين، والجيش قرر الوقوف في صف المواطنين وعزل جماعة الأخوان من الحكم، واعلان تعيين المستشار عدلي منصور كرئيس مؤقت للبلاد لحين أجراء انتخابات رئاسية.
تاني دلاله لاختيار يوم 3 يوليو لافتتاح المتحف المصري الكبير، هو أن اليوم ده هيكون في فصل الصيف، وده فصل بتكون حركة الأقبال السياحي فيه بتكون ضعيفة شوية علي مصر بسبب ارتفاع درجات الحرارة، وبالتالي اختيار الوقت ده هدفه زيادة التوافد السياحي علي مصر من الخارج في وقت الاقبال بيكون فيه ضعيف، وبالتالي اختيار التوقيت ده هيخلي الأقبال السياحي علي مصر هيكون كبير جدا، خصوصا أن كل الناس هتكون مترقبة وعايزة تدخل تترفع علي القطع الآثرية المعروضة بالمتحف، والآثار اللي أول مرة تخرج للنور.
طيب ازاي الدولة بتستعد لحفل الأفتتاح وهل هتكون في مفاجاة جديدة؟.
حفل افتتاح المتحف المصري الكبير هيكون عبارة عن مشهد اسطوري اقوي من المشاهد اللي الدولة عملتها في حفلين افتتاح طريق الكباش بالأقصر، ونقل المومياوات الملكية من المتحف المصري بالتحرير للمتحف القومي للحضارة، واللي الحكومة ممثلة في وزارة السياحة والآثار قدرت تخرج حفلين العالم كله اتكلم عليهم وكانوا أداه كبيرة من ادوات الترويج اللي الدولة اشتغلت عليها علشان تروج للسياحة المصرية، ويكون عامل جديد من عوامل الجذب السياحي لمصر من الخارج.
الدولة في الوقت الحالي عندها استراتيجية أننا نوصل لتحقيق 30 مليون سائح وتحقيق 30 مليار دولار كايرادات من قطاع السياحة في 2028، وعلشان نوصل للرقم ده لازم الدولة تقدم وسائل تحفيزية لاستقطاب السائحين من كل دول العالم للنزول لمصر وقضاء فترات الأجازات فيها بدلا من الدول المنافسة لينا، وهيكون افتتاح المتحف المصري الكبير اهم وافضل اداه في الوقت لتحفيز السائحين علي اختيار مصر بدلا من الدول المنافسة لينا سياحيا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
