أكد الإعلامي عمرو أديب أن النادي الأهلي سوف يحقق لقب الدوري مشيرا إلى تعثر منافسه بيراميدز متصدر الترتيب أمام فاركو.
وقال أديب خلال برنامج "الحكاية" المذاع على قناة "يطيب لي أن أتوجه بالتهنئة للنادي الأهلي على الفوز ببطولة الدوري هذا الموسم بعض الناس هيقولولي بدري لا مش بدري الأهلي خد الدوري
وأضاف: "الغريب أن تشعر أن هذه الحياة وهذا الكون يتحرك دائما من أجل أن الأهلي ياخد الدوري، امبارح ماتش بيراميدز وفاركو، بيراميدز اللي جنن الدنيا كلها يجي يتغلب أمام فاركو 3-2 كله عايز الأهلي ياخد الدوري".
وتابع: "احنا بنصحي كل يوم الصبح ليه مش نروح الشغل لا عشان الأهلي ياخد الدوري؛ احنا بنذاكر ليه مش عشان الامتحانات لا عشان الأهلي ياخد الدوري، الماتش يخلص امبارح تلاقي أحد مسؤولي فاركو يقولك مبروك لفاركو والأهلي".
وواصل: "طبيعي الاغنى مالا والأكثر جمهورا والأكثر سطوة واللي الناس بتعمل حسابه ومبيحبوش يدايقوه واحد يقولي ايه؟ استني يوم الخميس الجاي القرار بتاع لجنة التظلمات انت عايز تقولي إن يوم الخميس الجاي هيخصموا من الأهلي 3 نقط إضافية؟ دا يبقي حصل زلزال".
وأكمل: "النادي التعيس اللي بشجعه ده بقي نادي هندي عايش ينوح ويعيط وكل الماتشات بيتعادل ويتغلب وتعبان ومش قادرين يدفعوا مرتب الراجل واللاعيبة يخدوا فلوسهم وساعات ميخدوهاش وقاعدين كلنا مورناش غير زيزو جه وزيزو مشي فليذهب زيزو إلى الأهلي واحنا؟ احنا تعبانين جدا عشان كده يفوز الأهلي".
وأوضح: "الأهلي ياخد الدوري وياخد الكاس وافريقيا وياخد بطولة العالم وياخد إمام عاشور ويرجع كهربا من برة ويجيب ديانج ويجيب أربع مدربين مكان كولر، فلتكن أمة أهلاوية والشعب كله أهلاوي مع القوي مع الشديد دا بيشتروا لاعب كل يوم أكتر من المصانع اللي بتتعمل في مصر، بيعملوا بيهم ايه؟ بعد ما تاخد الدوري عايز ايه؟ في مثلا دوري الدوري، ألف مبروك وربنا يباركلكم".
وأكمل: "واحد يقولك خد بالك باقي أربع ماتشات وفي فرق نقطة لصالح بيراميدز، ياراجل هو ده الأهلي اللي نعرفه؟ دا بيراميدز على الأقل هيتغلب أربع ماتشات أو اتنين والأهلي يكسبهم الأربعة دا الأهلي دايما كده ومتسألش ليه".
واختتم: "أنا كان شعري زمان ده كستنائي كده بينزل على عنيا وكنت أقعد انفخه فوق شعري دا كله وقع من الأهلي محدش عنده حظ الأهلي الدنيا بتلف عشان الأهلي".
