إيه حكاية الأرقام القياسية اللي بتحققها السياحة اليومين دول وليه الموسم دا هيبقي موسم تاريخي.. وازاي السياحة هتعوض خسائر قناة السويس.
زي ما احنا عارفين وحسب الأرقام الرسمية السياحة المصرية بتشهد نهضة غير مسبوقة على كل المستويات اليومين دول مع التطور الكبير في المشروعات السياحية وتطوير المناطق الأثرية والسياحية والترفيهية وقالت الأرقام أن اكتر من 15 مليون سائح قضو 157 مليون ليلة خلال سنة 2024 في مصر ومن المتوقع استمرار الارتفاع إلى 182.6 مليون ليلة بحلول 2028 ودا حسب تقرير حديث لمؤسسة فيتش.
مصر حققت حوالي 16 مليار دولار ايرادات من موسم السياحة اللي فات ودا كان موسم تاريخي بردو رغم الأزمات اللي حصلت ولسه مستمرة في المنطقة.. يعني وسط الحرب والصراع السياحة في مصر بتجري وتقفز ودا بيقول أنه مع استقرار الأوضاع في المنطقة واستكمال المشروعات الضخمة في قطاع السياحة والترفيه مصر هتكون على موعد مع قفزات تاريخية جديدة وغير مسبوقة في تاريخ مصر.
ايه الجديد في ملف السياحة ؟
الارقام الجديدة بتقول إن مصر بتحقق موسم تاريخي جديد السنة دي .. ودا بعد نجاح القطاع في جذب 3.9 مليون سائح خلال الربع الأول من العام الحالى يعني خلال 90 يوم فقط بزيادة 25% مرة واحدة مقارنة بنفس الفترة العام السابق.. ولو الأرقام دي استمرت بنفس الوتيرة مصر ممكن يزورها ما بين 16 إلى 18 مليون سائح في 2025 وممكن الرقم يقرب من 20 مليون سائح وعلى فكرة ممكن حدا نوصل لده مع افتتاح المتحف المصري الكبير في يوليو اللي جاي ومع كم الدعاية الكبيرة في العالم للحدث.
وزير السياحة والآثار شريف فتحي شايف إن زيادة الاعداد بتعكس الثقة المتنامية في المقصد السياحي المصري رغم التحديات الجيوسياسية اللي بتشهدها المنطقة وتوقع تحقيق أرقام قياسية.. وأكد على أن مصر بتستهدف الوصول إلى 30 مليون سائح معتمدة على زيادة حجم الطاقة الفندقية بما يساهم في استيعاب الأعداد السياحية المتوقعة خلال الفترة الجاية ودا من خلال الحوافز والمبادرات التمويلية اللي طرحتها الدولة لتشجيع الاستثمار السياحي، وفق بيانات رسمية.
طيب ازاي السياحة عوضت خسائر قناة السويس؟
الحقيقة القفزة في إيرادات السياحة جت مع الخسائر الكبيرة في إيرادات قناة السويس ودا بسبب أحداث خارجة عن الإرادة بسبب الصراع في المنطقة والتوتر في جنوب البحر الاحمر.. لكن الاقتصاد المصري ورغم كده حقق معدل نمو بنسبة 4.3% خلال الربع التاني من العام المالي الجاري مدفوعا بانتعاش قطاع السياحة ممثلة في المطاعم والفنادق بنسبة 18% ومتفوقا على قطاعي الصناعة التحويلية غير البترولية واللي حقق 17.7%، والاتصالات وتكنولوجيا المعلومات وحقق 10.4%... يعني السياحة هي الحصان الكسبان في الاقتصاد المصري وهي قدرت تعوض النقص في إيرادات قناة السويس وتحفظ الاستقرار في سوق الصرف وتضمن عدم حدوث هزات مالية.
فيه حاجة تانية لازم نخلي بالنا منها وهي إن مصر دلوقتي شغالة على خطة طموحة جدا لزيادة الطاقة الفندقية في قطاع السياحة لاستيعاب ملايين الضيوف اللي بيزيدو كل سنة ودلوقتي مصر فيها اكتر من 220 ألف غرفة بخلاف وضع ضوابط واشتراطات جديدة لترخيص وحدات شقق الإجازات واللي ممكن ترفع الطاقة الفندقية لحوالي نص مليون غرفة.
معلومة صغيرة ليك في اخر الفيديو بتقول إن مطار الغردقة الدولي استقبل خلال الـ 48 ساعة اللي فاتت حوالي 218 رحلة طيران دولية وصلت من عدد من المطارات الأوروبية في مقدمتها ألمانيا وانجلترا وروسيا وعلى متنها اكتر من 33 ألف سائح من مختلف الجنسيات.. ودي مؤشرات بتقول إننا هنشوف موسم سياحي تاريخي في إيرادات ممكن تصول 20 مليار دولار.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
